En mecánica de solos, expresión proposta por Alec W. Skempton, definida como a relación entre o índice de plasticidade (%) e o contido de arxila (%). O seu valor depende en gran medida da mineraloxía das partículas do solo. A actividade do cuarzo é de 0; a da calcita é de 0,18; a da caolinita atópase entre 0,33 e 0,46; a da ilita é de 0,90; a da montmorillonita-Ca é de 1,5 e a da montmorillonita-Na é de 7,2. De acordo con Barnes, as arxilas clasifícanse en: (1) arxilas moi activas (índice superior a 2); (2) activas (1,25 – 2,00); (3) normais (0,75 – 1,25) e (4) inactivas (menor de 0,75).