Encima hidrolase que cataliza a reacción de hidrólise dos enlaces 1-4 entre as unidades de glicosa na degradación do amidón (amilólise), polo que intervén no ciclo do carbono. Existen dous tipos principais moi abundantes no solo: α-amilase ou glicoxenase, sintetizada por plantas, animais e bacterias (actúa ao longo de calquera punto da cadea dos hidratos de carbono, descompoñéndoos en maltotriosa e maltosa desde a amilosa ou ben en maltosa, glicosa e dextrina desde a amilopectina); e β-amilase ou amilase sacaroxénica, sintetizada principalmente por bacterias, fungos e plantas (actúa desde o extremo non redutor da cadea, catalizando a hidrólise do segundo enlace α-1,4, rompendo dúas unidades de glicosa (maltosa) á vez). Dado que a α-amilase pode actuar en calquera punto da cadea é máis rápida que a B-amilase.