Auga contida nunha proporción fixa na rede cristalina dalgúns minerais, cuxas moléculas están unidas por atracción de dipolos, e poden ser eliminadas, por quecemento p.ex., o que dá lugar a unha especie mineral distinta, sen que varíe de forma significativa a súa composición química. A incorporación de auga á estrutura dun mineral produce igualmente unha substancia nova. Por exemplo a anhidrita (CaSO₄), coa incorporación de dúas moléculas de auga, transfórmase en xeso (CaSO₄ · 2 H₂O). Igualmente acontece co sistema tenardita (Na₂SO₄) – mirabilita (Na₂SO₄ · 10 H₂O). Xeralmente se trata de compostos que cristalizan en medios acuosos.