Ferramenta de corte que se introduce no solo de forma manual, polo xeral por rotación, para extraer mostras a distintas profundidades. Existen diversos tipos de barrenas e o deseño máis axeitado para cada caso dependerá das características do solo do que tomar mostras. Hainas helicoidais, en forma de culler e en tubo, entre outras. As máis utilizadas constan dun cilindro aberto lateralmente, acabado pola súa parte inferior cunha peza en espiral e polo outro extremo cunha barra vertical extensible e un mango transversal. As mostras obtéñense alteradas ao se mesturar o material e destrúese a súa disposición natural no solo segundo se introduce a barrena. Tómanse para análises químicas no laboratorio. En campo, serven para describir en cada profundidade: a cor; a existencia de raíces e as súas características; a presenza dalgúns compoñentes (carbonato cálcico, xeso, salinidade); a clase textural; e o contido de humidade, entre outras características.