Materia vexetal seca, que é a materia prima máis abundante dispoñible na Terra para a produción de biocombustibles, principalmente bioetanol.

Inclúe tódalas plantas terrestres (árbores, arbustos e pastos) e a biomasa residual producida a través de diversos sectores agroindustriais (restos de millo, bagazo de caña de azucre e palla, entre outros) e a silvicultura (descartes de serradoiros e fábricas de papel, entre outros).

A lignocelulosa está formada por polímeros de celulosa (40-50 %) e hemicelulosas (20-30 %) unidos fortemente á lignina, o que lle confire un carácter recalcitrante fronte a unha hidrólise encimática, catalizada por encimas oxidorredutases, para extraer os azucres e posterior fermentación anaerobia para a produción de bioetanol.