Conxunto de flora e fauna dun lugar determinado.

No solo está constituída por microorganismos (arqueas, protistas, bacterias), fungos, fauna edáfica e plantas. O solo proporciona multitude de hábitats e subministra a enerxía para o desenvolvemento das súas funcións, pero á vez a biota contribúe á formación do mesmo, acelerando os procesos de meteorización e influíndo nas condicións físicas e químicas. Xunto co material parental, o relevo, o clima e o tempo constitúe un dos cinco factores de formación principais dos solos.

Transforma a enerxía (a través da súa participación na descomposición (mineralización) da materia orgánica incorporada ao solo e a mobilización/inmobilización de nutrientes), crea e modifica o seu hábitat (estrutura do solo, porosidade e propiedades hídricas), inflúe na saúde do solo (eliminación de compostos tóxicos e contribución á supresión de enfermidades) e axuda na regulación dos gases de efecto invernadoiro (respiración do solo, liberación e oxidación de metano, desnitrificación).