Fenómeno polo cal a superficie dun líquido situado dentro dun tubo cilíndrico moi estreito (tubo capilar) se eleva ou deprime segundo o líquido molle (p. ex. auga-vidro) ou non (p. ex. mercurio-vidro). O menisco que se forma caracterízase polo seu ángulo de contacto líquido-sólido. A altura de ascenso capilar vén dada por: h = [2γcosα]/[g(ρ_l – ρ_g)r], onde ρ_l é a densidade do líquido, ρ_g é a densidade do gas (xeralmente desprezable), g é a aceleración da gravidade, r é o radio do tubo capilar, α é o ángulo de contacto, e γ é a tensión superficial líquido-aire.