Nun agrosistema (agrícola ou forestal), o ciclo de nutrientes é aberto, debido ás exportacións de nutrientes coas colleitas e ás posibles perdas por percolación, erosión e volatilización.

As estratexias para pechar o ciclo de nutrientes e compensar as extraccións, para que a fertilidade do solo non diminúa, dependerá do tipo de agricultura que se practique. Por exemplo, na agricultura convencional e mais na agricultura industrial recórrese a importar nutrientes de fóra do sistema coa aplicación de fertilizantes de síntese; mentres que na agricultura ecolóxica procúrase reciclar o máximo de residuos orgánicos da propia explotación (estercos, fertilizacións en verde) e a aplicación de produtos naturais.