Serie de fases polas que pasa periodicamente a auga en forma líquida, sólida e gasosa na natureza. Este movemento da auga ten lugar en distintos compartimentos: a atmosfera, as plantas, o solo, os materiais xeolóxicos e os leitos e reservorios de auga. As distintas etapas deste ciclo constitúen un aspecto fundamental do sistema solo-planta-atmosfera, xa que inflúen no crecemento das plantas. A enerxía solar é a forza impulsora do ciclo hidrolóxico e ten os compoñentes seguintes: evaporación, transpiración (evapotranspiración), condensación do vapor de auga, precipitación (en forma de auga, neve ou sarabia), interceptación pola vexetación, escoamento superficial, infiltración, percolación, percolación profunda (drenaxe) e fluxos de retorno. A súa análise baséase na apreciación cuantitativa, no marco dun balance, dos termos implicados nos intercambios entre os distintos compartimentos do sistema, así como na determinación cuantitativa e cualitativa dos fluxos entre estes compartimentos.