Composto químico de natureza orgánica que é tóxico ou velenoso a baixas concentracións. Caracterízanse por un elevado peso molecular e carácter apolar, e por ser moi estables, polo que son os máis persistentes no solo.

Entre eles atópanse: os hidrocarburos policíclicos aromáticos (HAPs), que se forman principalmente durante a combustión incompleta de substancias orgánicas, como o carbón, o petróleo, a gasolina; os produtos fitosanitarios e os seus derivados.

Os chamados contaminantes orgánicos persistentes (COP) teñen catro características básicas: persistencia, bioacumulación, potencial de transporte a longa distancia e efectos adversos sobre a saúde humana e o medio ambiente. Neste grupo inclúense algúns praguicidas (como DDT), compostos químicos industriais (como os binefilos policlorados, os PCBs), e produtos derivados de procesos industriais (como as dioxinas e os furanos).