Representación gráfica do tamaño dos poros dun volume de solo agrupados en clases de porosidade segundo os tamaños crecentes de poros. Establécese por medio de medidas cun porosímetro. Os datos represéntanse nun diagrama semilogarítmico, cuxo eixe de abscisas é logarítmico e nel represéntase o valor extremo das sucesivas clases de porosidade, atendendo ao diámetro aparente de poros. O eixe de ordenadas é decimal e nel represéntanse as porcentaxes de 0 a 100 %, empezando pola clase de porosidade de menor tamaño. A curva constrúese levando ao valor extremo de cada clase de porosidade a porcentaxe acumulada das porcentaxes das clases precedentes, de maneira que o valor extremo da clase de porosidade de maior tamaño de poros corresponda ao 100 %. Permite visualizar a distribución do tamaño de poros dunha mostra.