Operación que serve para determinar o grao de adhesividade dun solo. Realízase en mostras de solo suficientemente húmidas, das que foron extraídos os elementos grosos. Consiste en formar unha pasta entre o dedo polgar e o índice, e verificar o seu comportamento.
Establecéronse catro clases de adherencia: 1) non adherente, o material non queda adherido o premelo entre o polgar e o índice; 2) lixeiramente adherente, o material adhírese aos dedos, pero ao separalos, un deles queda case limpo e non se observa estiramento; 3) moderadamente adherente, o material adhírese e, ao intentar separar os dedos, tende a se estirar e parte; e 4) moi adherente, o material queda fortemente adherido a ambos os dedos e, ao separalos, estírase.