Arbustos e árbores da familia Rhizophoraceae, orixinarios das costas tropicais e subtropicais de América. Entre eles o mangleiro vermello, Rhizosphora mangle L., que pode alcanzar uns 20 ou 30 m de altura e é característico de solos inundados a maior parte do ano e cunha salinidade elevada (solos de mangleiral).

Posúen glándulas excretoras de sal e raíces aéreas adventicias (pneumatóforos) que crecen a partir das ramas da árbore en dirección ao solo no que enraízan. Estas raíces adventicias poden ser simples ou dicotomicamente ramificadas con numerosas aberturas hidrófobas (lenticelas) permeables ao aire (absorben e difunden osíxeno) e impermeables á auga. Caracterízanse por presentar un tecido aerífero interno (aerénquima) no parénquima para o transporte de gases (osíxeno) desde as raíces adventicias até o solo, co que se crea un ambiente oxidante na rizosfera, acelerando o crecemento radicular (das raíces máis novas, que son as que crecen máis rapidamente).