Utensilio composto dun aro, xeralmente metálico, que enmarca unha malla de arame ou de fíos de teflón, empregado para separar partículas de diferentes tamaños. Os fíos da malla entrecrúzanse deixando ocos cadrados de tamaño homoxéneo e abertura ou luz coñecida. Existen diversos sistemas estándar de peneiras: ASTM (USA), BSI (UK), DIN (Alemaña), AFNOR (Francia) e JSA/JIS (Xapón), entre outros. No sistema estándar de Estados Unidos, (ASTM E 11-61), a luz dunha peneira especifícase polo número de mesh, que corresponde ao número de arames por polgada, e ao tamaño mínimo de partícula que reterá a peneira. En moitos casos, as peneiras comercialízanse segundo este sistema.