Organismos pertencentes á Clase Symphyla (sínfilos) que xunto cos Chilopoda (cempés), Diplopoda (milpernas) e Pauropoda (paurópodos) conforman o subfilo dos miriápodos (Myriapoda) incluídos no filo Arthropoda.

Teñen un corpo alongado moi pequeno (1-8 mm de longo), de cor branca. A cabeza presenta as antenas e as pezas bucais, non teñen ollos. O tronco posúe doce segmentos e na súa parte posterior presenta un par de cercos, con glándulas que segregan seda.

Son saprófagos, alimentándose de materia orgánica en descomposición semilíquida ou ben de raíces de plantas.

Habitan en lugares moi húmidos, debaixo da follada ou onde hai materia orgánica en descomposición. Son moi comúns en solos cultivados e algunhas especies son pragas importantes dos cultivos.