Filo de organismos de 0,1 a 1,7 mm, que forman parte da microfauna do solo. O seu corpo divídese en cabeza con dous ocelos e un tronco con catro pares de patas non articuladas terminadas en garras (as formas terrestres). Posúen un tubo bucal con estiletes que evaxinan para perforar os tecidos vexetais e animais e succionar os fluídos. Viven principalmente nos musgos e nas películas de auga que rodean as partículas do solo. Comprenden unhas mil cen especies no mundo. Coñécense comunmente como osos de auga e son capaces de tolerar condicións ambientais moi extremas (temperaturas elevadas ou de conxelación, radiación ionizante, deshidratación, anoxia, salinidade) adoptando un estado criptobiótico (suspensión do metabolismo).