Proporcións relativas das distintas fraccións de partículas minerais dunha mostra de solo establecidas segundo o seu tamaño. A partir das proporcións de arxila, limo e area e con axuda dun triángulo de texturas pódese establecer a clase textural á que pertence a mostra. Debe terse en conta que, tanto o número de fraccións de tamaños, como os criterios para establecer os límites entre as distintas fraccións granulométricas, varían co sistema de clasificación utilizado, sendo o máis xeneralizado o do Departamento de Agricultura de Estados Unidos de América (USDA).