Compostos aromáticos de carácter fenólico procedentes da descomposición da materia orgánica do solo ou de sedimentos. Corresponde a substancias húmicas de coloración amarelada e natureza coloidal. Son facilmente dispersables en auga e non precipitables polos ácidos, de modo que poden extraerse do solo pola súa solubilidade en disolucións ácidas e alcalinas. Purifícanse mediante adsorción en resinas non iónicas, para separalos doutros compostos orgánicos solubles moi hidrófilos non húmicos (hidratos de carbono, aminoácidos, entre outros).

Son as substancias húmicas que presentan maior solubilidade e posibilidades de migración e transporte de ións e compostos no medio natural, debido a que son as de máis baixo peso molecular e maior contido en grupos funcionais osixenados de alta reactividade.

En efecto, os ácidos fúlvicos, con gran diferenza respecto do resto de substancias húmicas, conteñen numerosos grupos ácidos (carboxilo, -COOH), OH-fenólicos e cetónicos que lles confiren o seu carácter hidrófilo e permiten a súa solubilidade en auga en toda a escala de valores de pH.

Determinadas fraccións fúlvicas de baixo peso molecular poden presentar bioactividade, é dicir, estimulan o crecemento vexetal, motivo polo cal se comercializan produtos naturais de tipo fúlvico para ser aplicados ao solo e favorecer a produción agrícola.