Ausencia de osíxeno nun solo, xeralmente debida á saturación por auga que xera condicións redutoras que afectan ao comportamento e á mobilidade dos elementos con distintos estados redox. Os medios anóxicos adoitan presentar coloracións verdosas, azuladas ou negras debido á presenza de fases sólidas de ferro en forma reducida (fosfatos, hidróxidos e sulfuros), ou grises debido a perdas de color resultantes de procesos de empobrecemento de ferro(II) mobilizado pola auga freática. Os medios fortemente anóxicos poden presentar un olor característico, xa que se forma ácido sulfhídrico (H₂S) ou ben emiten metano, (CH₄).