Característica cinética dun elemento ou dun compoñente dun composto químico que fai que poida ser incorporado no metabolismo dun organismo específico. Refírese tanto a nutrientes como a contaminantes. A biodispoñibilidade depende das propiedades do solo que controlan a concentración e a mobilidade dos elementos e dos compostos, como son as condicións do medio (pH, E_h, contido de carbono orgánico) e as reaccións de control (equilibrio ácido-base, complexación con ligandos orgánicos e inorgánicos, precipitación e disolución de sólidos, oxido-redución, intercambio iónico e adsorción, e degradación fotoquímica ou microbiana, entre outros). Un mesmo elemento químico non ten a mesma biodispoñibilidade segundo o organismo receptor e a especie química da que forme parte (p. ex., N₂ fronte a NO₃⁻, ou o Al³⁺ fronte ao fulvato de aluminio).