Técnica de remediación ambiental que utilizan algúns animais (xeralmente detritívoros) que poden tolerar medios con forte toxicidade e teñen a capacidade, directa ou indirecta mediante microorganismos no seu aparato dixestivo, de acumular ou degradar contaminantes.

Os moluscos utilízanse para depurar augas contaminadas e algunhas especies de miñocas, para descontaminar solos, por exemplo, contaminados con fenois, praguicidas e metais pesados. Determinados metais como o cadmio e o cinc son bioacumulados nalgunhas especies de miñocas, sen que resulten tóxicos para elas.