Técnica de remediación microbiana para biodegradar mediante o uso de microorganismos a contaminación causada pola presenza de xenobióticos derivados da actividade industrial ou agrícola, tales como: compostos nitro-aromáticos, compostos orgánicos haloxenados e pesticidas.

As bacterias que se usan para a biorremediación de xenobióticos inclúen bacterias aerobias, anaerobias, metanotróficas, metanóxenas, cianobacterias e esfingomonas. As do xénero Pseudomonas son unhas das utilizadas; así e todo, a maioría das veces a degradación destas moléculas complexas non é total, polo que se require de consorcios ou grupos de microorganismos, que poden combinar as súas respectivas capacidades encimáticas para lograr a eliminación total do contaminante.