Equipo de laboratorio que permite equilibrar o contido de auga, θ, dunha masa ou volume de solo, cun valor de presión de aire constante prefixado que, no equilibrio, corresponderá ao potencial matricial da auga da mostra, ψ_m.

Este equipo permite determinar por desecamento o contido de auga a un potencial matricial determinado, entre eles a -33 kPa e -1500 kPa, ou ben a rama da curva característica de humidade (debido ao fenómeno de histérese). Consta de: un recipiente de peche hermético (cámara) conectado a unha entrada de aire e a un manómetro; unha placa porosa cunha cara superior que estará á presión de aire que se aplique (placa de presión), mentres que a cara inferior estará á presión atmosférica ao estar illada do sistema por unha envoltura de caucho suxeita cunha abrazadeira, constituíndo un compartimento estanco conectado cun pequeno tubo co exterior da cámara, o que permite que a saída da auga atravese a placa porosa (célula a presión atmosférica); un manómetro; unha entrada de aire a presión á cámara e unha saída de auga da cámara pola parte inferior da placa porosa e de aí ao exterior.

Para determinar un punto da curva
(θ_i, ψ_mi),
colócase enriba da placa porosa (cerámica ou de acetato de celulosa) a mostra nun anel de goma que fai ás veces de recipiente, satúrase con auga, introdúcese a placa dentro da cámara e péchase hermeticamente a cámara. Faise entrar aire a presión suavemente ata o valor de presión desexado, que deberá permanecer constante. Déixanse equilibrar o contido de humidade e a presión de aire aplicada, o que sucede a partir do momento en que deixa de saír auga polo tubo que conecta a célula a presión atmosférica co exterior. O contido de humidade da mostra determínase gravimetricamente por secado en estufa. Con sucesivos procesos de equilibrado pódense ir obtendo puntos da curva característica de humidade.

Este método permite traballar ata a gama alta de potenciais matriciais (en valor absoluto, xa que son negativos). A curva de desorción obtida pódese aplicar ao estudo de procesos de drenaxe, evaporación e extracción de auga polas plantas.