Grupo de encimas que catalizan a hidrólise dos enlaces glicídicos da celulosa e outros polisacáridos relacionados en monómeros de glicosa (celulólise).

A hidrólise de celulosa require as seguintes actividades encimáticas: 1) endo-β-1,4-glucanase, que cataliza a rotura das interaccións non covalentes presentes na estrutura amorfa da celulosa; 2) exo-β-1,4-glucanase ou celobiohidrolase, que cataliza a hidrólise dos extremos da cadea para romper o polímero en segmentos de dous a catro unidades como a celobiosa; e 3) B glicosidase, que hidroliza os disacáridos e tetrasacáridos en glicosa.

As celulases son producidas por especies de bacterias especializadas (p. ex., Cytophaga, Sporocytophaga, Cellvibrio), por numerosos fungos e por algúns protozoos.

Salvo contadas excepcións, os animais non producen celulase e para dixerir máis eficientemente as plantas requiren da actividade de microorganismos nos seus estómagos ou intestinos; mentres que os térmites válense de fungos que cultivan nos seus niños e que dixiren a celulosa.