Elemento químico, metal pesado, de símbolo Zn, número atómico 30, masa atómica 65,38 e estado de oxidación +2 . Atópase en minerais ferromagnesiáns e silicatos. En solos con pH inferior a 7,7 atópase como Zn²⁺, mentres que en solos con pH máis elevados está como ZnOH⁺. É un micronutriente esencial para as plantas e para os seres humanos ao intervir no metabolismo das proteínas e dos ácidos nucleicos, se ben a concentracións altas é un elemento tóxico. Pode encontrarse en solos de antigas zonas industriais, en lodos de depuradora, en xurros de cocho e en augas residuais industriais non tratadas. Non se considera canceríxeno.