Interacción biolóxica a longo prazo na que un dos intervenientes obtén un beneficio, mentres que o outro nin se prexudica nin se beneficia (relación unidireccional). O comensal (a especie que se beneficia) obtén nutrientes, acubillo, soporte ou transporte. Contraponse ao mutualismo no que ambos organismos se benefician; ao amensalismo no que un resulta danado e o outro non sofre ningún efecto, e ao parasitismo onde un se beneficia e o outro resulta prexudicado.

O termo provén do latín cum mensa, que significa compartindo a mesa. Orixinalmente foi usado para describir o uso de comida de desfeito por parte dun segundo animal, como as especies preeiras que seguen aos animais cazadores ou depredadores e aproveitan para alimentarse dos restos deixados por eles. Posteriormente, o significado do termo ampliouse para incluír outras formas de comensalismo: 1) forese, na que un organismo é utilizado por outro xeralmente máis pequeno para trasladarse, p. ex., numerosos ácaros sobre escaravellos ou moscas; 2) inquilinismo, no que un organismo se aproveita doutro para hospedarse, p. ex., plantas epífitas, que viven sobre as árbores; e 3) Metabiose ou tanatocrese , na que un organismo crea un ambiente favorable para o segundo, p. ex., excrementos, esqueletos ou cadáveres dun organismo como protección ou alimento para outro organismo.