Proceso que se produce nunha disolución cando se modifica o equilibrio iónico dun sal polo cambio da concentración (actividade química) dun dos ións procedentes dese sal. Está asociado ao produto de solubilidade do devandito sal (K_ps). Así, se un sal que se atopa en equilibrio nunha disolución entra en contacto con outra que contén un ion común coa primeira, o aumento da concentración do ion común fai diminuír a solubilidade do sal, de forma que para que se restableza o equilibrio e se manteña o produto de solubilidade a unha determinada temperatura, se produce unha precipitación e se modifica a concentración da disolución (principio de Le Chatelier). Este proceso é relevante, por exemplo, na disolución/precipitación de sales nos solos salinos.