A escala macroscópica, tipo de estrutura cunha disposición natural duradeira de partículas elementais (arxila, limo, area e materia orgánica) unidas entre si, caracterizada por agregados máis ou menos esféricos, pouco ou non porosos, cuxas caras non casan coas caras dos agregados contiguos, polo que deixan un espazo poroso importante. Orixínase pola acción conxunta de axentes de orixe biolóxico (hifas de fungos, microartrópodos, miñocas, formigas, etc.) e as unións non biolóxicas das partículas elementais (por fenómenos de floculación e formación de complexos de superficie externa). É característica de solos ricos en materia orgánica e cunha actividade biolóxica elevada, como os das praderías de gramíneas, nas que, ao arrancar un terrón de céspede, colgan das raíces este tipo de agregados.