Proceso de diminución progresiva do nivel de fósforo dispoñible para as plantas. A fixación acontece mediante diversos mecanismos, como por exemplo por precipitación de anións fosfato con catións do solo (preferentemente, Ca²⁺, en medios calcarios, e Al³⁺ en medios acidos), ou por sorción nos compoñentes do solo, ben por substitución de grupos funcionais -OH estruturais dos filosilicatos 1:1, da gibbsita e/ou oxihidróxidos de ferro, aluminio e manganeso, ben mediante coadsorción con catións intercambiables (preferentemente, Ca²⁺, Al³⁺, Fe³⁺ e Mn²⁺) que actúan de ponte entre as superficies con carga eléctrica e o anión fosfato. A fixación é gradual e depende da enerxía da adsorción e/ou da solubilidade dos sales de fósforo precipitados. No solo, en condicións abióticas a fixación aumenta co tempo. Algúns autores diferencian entre fosfato retido, que é a fracción de fosfato que se pode extraer con ácidos diluídos e que é relativamente asimilable polas plantas, e fosfato fixado, que é a fracción non extraíble con ácidos diluídos.