Forzas resultantes causadas pola tensión superficial, que explican o fenómeno do ascenso dun líquido nun tubo capilar (acción capilar ou capilaridade). Débense á coexistencia de tres fases no solo (sólida, líquida e gasosa). A elas débese a formación de meniscos nos poros do solo, que actúan a modo de tubos capilares, polo que controlan os procesos de retención de auga no solo. O ascenso, h, de auga nun tubo capilar de radio r, exprésase pola lei de Jurin: h = (2σcosθ)/ρ_wgr, sendo θ o ángulo de contacto e ρ_w a densidade de líquido. Por conseguinte, o enchemento capilar dos poros terá lugar antes nos poros de menor radio (solos arxilosos), mentres que o baleirado capilar se producirá antes nos poros de maior radio (solos areosos).