Proceso de entrada de auga (e das substancias nela disoltas) no solo a través da súa superficie, nun movemento que, polo xeral, é vertical descendente pola acción da gravidade. Vén condicionado polas características hidrodinámicas, a textura, a estrutura e a estabilidade dos poros da parte superior do solo, así como pola distribución da auga xa presente no solo, as propiedades de almacenaxe de auga (condicións iniciais de humidade) e pola intensidade, cantidade e duración da achega. Se a auga chega á superficie do solo cunha enerxía de impacto elevada, o solo está nu e os agregados son inestables, a infiltración pode diminuír co tempo pola formación dun selo na superficie do solo.

A importancia da infiltración reside no feito de que a auga infiltrada será almacenada na zona non saturada e estará a disposición das raíces, mentres que a auga non infiltrada permanecerá en superficie en terreos solos, provocando alagamento, ou dará lugar a auga de escoamento superficial en ladeiras e podería provocar procesos erosivos. Ver: infiltración estacionaria, infiltración non estacionaria, infiltrabilidade, réxime de infiltración, condicións de contorno, taxa de infiltración, velocidade de infiltración e infiltración acumulada.