Infiltrómetro que consiste en dous cilindros metálicos de distinto diámetro (un cilindro de garda e outro cilindro de medida, ambos co bordo inferior biselado) e un dispositivo que permite ir engadindo auga ao cilindro de medida ao longo do ensaio, de maneira que se pode ir medindo o volume de auga incorporado (frasco de Mariotte ou outro dispositivo). Para operar crávanse de forma concéntrica os dous cilindros no solo a unha profundidade duns 5 cm, énchense de auga ata un determinado nivel, que se manterá constante ao longo do ensaio no cilindro interior — ou de medida— por medio dun frasco de Mariotte ou outro dispositivo que permita ir medindo con precisión o volume de auga engadido.

A relación entre o volume de auga engadido, referido á unidade de superficie (cilindro interior) e o tempo transcorrido permite calcular a velocidade de infiltración. O uso do dobre cilindro dá mellores resultados, xa que con el se limita a influencia do contorno e obtense un fluxo vertical no cilindro interior grazas á coroa exterior. É un método que consome moita auga en solos moi permeables e moito tempo en solos pouco permeables, e que resulta difícil de aplicar en solos pedregosos. A expresión é: i = ΔQ/AΔt, sendo Q o volume de auga, A a superficie do cilindro de medida (interior) e t o tempo transcorrido. Para ter en conta a variabilidade dos solos as medidas deben realizarse cando menos por triplicado.