Maneira na que ten lugar a relación entre a fase líquida e a fase sólida do solo. Existen tres mecanismos principais que permiten explicar a unión da auga ás partículas sólidas do solo que constitúen a matriz: (1) adhesión directa das moléculas de auga ás superficies sólidas debido ás forzas de London-van der Waals; (2) unións por capilaridade da auga resultantes de forzas adhesivas e cohesivas; e (3) unións osmóticas da auga por ións de signo contrario nas dobres capas eléctricas. Estas forzas fan que o solo reteña auga fronte ás forzas da gravidade, a demanda de evaporación da atmosfera e a absorción de auga polas plantas.