As técnicas para determinar a densidade aparente dun solo pódense agrupar en: 1) métodos destrutivos, ao non poder ser repetidos no mesmo lugar, uns miden o volume aparente dunha masa de solo (método do cilindro, método do cono de area, método da membrana), outros determinan o volume aparente aplicando o principio de Arquímedes (método da parafina, método da inmersión en mercurio); 2) métodos non destrutivos (método de raios gamma); 3) método de escáner de tomografía informatizada (CT) de transmisión de raios X. O estudo da densidade aparente resulta de interese en áreas con risco de compactación, xestión do solo e técnicas de cultivo, e como criterio de diagnóstico nalgunhas clasificacións de solos, p. ex. en Andisolos (ST) ou Andosolos (WRB).