Termo empregado para facer referencia aos invertebrados terrestres integrados na suborde Lumbricina (Filo Annelida, Clase Clitellata, orde Haplotaxida). Até o momento inclúe 23 familias e unhas 7000 especies descritas. Aínda que colonizan unha gran variedade de hábitats, a maioría son terrestres, preferindo solos húmidos onde se alimentan de follas e materia orgánica en descomposición. Considéranse enxeñeiros dos ecosistemas polo importante labor que exercen nos procesos de descomposición da materia orgánica, a reciclaxe de nutrientes e a mellora da estrutura do solo e a súa permeabilidade e o crecemento vexetal. Son compoñentes da macrofauna do solo.