Organismos artrópodos pertencentes ao subfilo Myriapoda, de hábitos terrestres, que se caracterizan por ter un elevado número de patas. Forman parte da macrofauna (cun diámetro corporal entre 2 e 10 mm).

O filo comprende catro clases: Chilopoda (cempés), Diplopoda (milpernas), Pauropoda (paurópodos) e Symphyla (sínfilos). Os primeiros dous grupos conteñen un maior número de especies.

Teñen un corpo alongado, segmentado, dividido en cabeza e tronco, no que se insiren as patas. Na cabeza teñen: un par de antenas (ramificadas en paurópodos); ocelos (ás veces formando agrupacións ou pseudocelos e nalgúns casos faltan); as pezas bucais (todos teñen mandíbulas e un ou dous pares de maxilas con distintos graos de fusión); nalgunhas especies poden aparecer órganos de Tömösvary (sensoriais). O tronco divídese nun número variable de segmentos (12 a 180) e de cada un sae 1 ou 2 pares de apéndices (patas).

Os quilópodos son depredadores e aliméntanse de pequenos invertebrados; os diplópodos e paurópodos aliméntanse de materia orgánica en descomposición, algúns de fungos e de materiais semilíquidos; os sínfilos son herbívoros e detritívoros. Aqueles que teñen a capacidade de escavar inflúen na porosidade do solo.