Elemento metálico de transición, de símbolo Ni, número atómico 28, peso atómico 58,70 e estados de oxidación +2, +3. Atópase de forma natural como resultado da meteorización en solos desenvolvidos a partir de rochas ultrabásicas, en especial serpentinitas. Se ben é un elemento esencial para algunhas plantas, xa que entra a formar parte das enzimas (ureasa), se se acha en exceso resulta tóxico para as especies non tolerantes. Se as concentracións de níquel son altas, no solo só poden vivir plantas endémicas. Pódese atopar en solos de antigas zonas industriais e en solos tratados con lodos de depuradora contaminados. Pode proceder de achegas de xurros de porco, xa que ao ser un cofactor do crecemento, se incorpora aos pensos destes animais, así como de augas residuais industriais non tratadas. As plantas que se cultivan en solos contaminados acumúlano, de modo que pode entrar na cadea trófica e pode ser prexudicial para a saúde.