Entidade biolóxica capaz de realizar o seu ciclo vital integramente ou parcialmente no solo no cal se desenvolve, despraza, alimenta, excreta, reproduce e morre, e sobre o que exerce efectos directos e indirectos.

O conxunto de seres vivos cuxo hábitat é o solo resulta esencial na formación dos solos e no funcionamento dos ecosistemas de todo o mundo, xa que intervén na transferencia de materia e enerxía, no ciclo bioxeoquímico dos elementos e en moitas das funcións e servizos ecosistémicos que desenvolven os solos.

A biodiversidade dos organismos no solo depende principalmente: 1) das condicións do medio (temperatura, réxime de humidade, aireación, valores de pH, entre outros); 2) das fontes das que obteñen enerxía e nutrientes (autótrofos ou heterótrofos); 3) da profundidade e das diferenzas entre os horizontes dun solo.

Estes factores provocan a segregación das poboacións e determinan as súas actividades (funcións e servizos ecosistémicos). Os criterios que se utilizan para diferencialas son: tamaño, hábitat, funcións e servizos ecosistémicos.