En referencia ao solo, fragmento de rocha individualizado. Un conxunto de partículas nun determinado volume descríbese segundo a súa heterometría (diversidade de tamaños), orientación e distribución. Cada partícula descríbese atendendo ao seu tamaño, forma (esfericidade, redondez e puído), dureza, litoloxía, grao de meteorización e revestimentos. Segundo o tamaño clasifícanse en: elementos grosos (maiores de 2 mm) e terra fina. Os elementos grosos clasifícanse en grava miúda, grava e bloques, cuxos límites varían segundo os autores. A terra fina, de acordo cos criterios do USDA, divídese en tres fraccións texturais: area (2 mm a 50 μm), limo (50 μm a 2 μm) e arxila (menor de 2 μm). A redondez e esfericidade descríbense no campo por comparación coa táboa de Hodgson.