Propiedade dun corpo poroso de presentar resistencia ao fluxo saturado dun fluxo newtoniano que caracteriza cuantitativamente a súa permeabilidade e que se considera que só depende das propiedades dese medio e é independente das características do fluído. A súa ecuación de dimensións é [L²]. Pódese expresar en función da condutividade hidráulica saturada (K) e da fluidez (f) como k=K/f=K×η/ρ×g, onde k é a permeabilidade intrínseca, η é o coeficiente de viscosidade dinámica, ρ é a densidade do fluído e g é a aceleración da gravidade.

Esta ecuación expresa a independencia da permeabilidade intrínseca das propiedades físicas do fluído e non ten en conta as posibles interaccións do mesmo coas partículas sólidas. Os cambios na permeabilidade intrínseca atribuíbles a efectos de interacción sólido-fluído son maiores en solos cunha superficie específica alta. Estas interaccións poden ter consecuencias importantes nas análises de vulnerabilidade a desastres naturais relacionados cos riscos de inundación, derrubamento, colapso e contaminación de acuíferos (Montoro e Francisca, 2010).