Planta dicotiledónea non fabácea que forma asociacións simbióticas con Actinobacterias do xénero Frankia. A interacción entre planta e bacteria da lugar á formación dun novo órgano na raíz, o nódulo (actinorriza), no que se leva a cabo a fixación do N₂ atmosférico. Dentro das vesículas, nos nódulos que forma, atópase a nitroxenase, encima responsable da transformación de N₂ da atmosfera en NH₃ asimilable polas plantas.

As especies de plantas actinorrícicas pertencen a oito familias incluídas en tres ordes de anxiospermas: orde Fagales: 1) familia Betuláceas: amieiro (Alnus glutinosa (L.) Gaertn), amieiro de Nápoles (Alnus cordata (Loisel.) Duby); 2) familia Casuarináceas: Allocasuarina, Casuarina; 3) familia Miricáceas: Comptonia, Myrica faya; orde Cucurbitales: 4) familia Coriariaceas: Coriaria; 5) familia Datiscáceas: Datisca; orde Rosales: 6) familia Elaeagnáceas: Elaeagnus, Hippophae; 7) familia Rhamnáceas: Ceanothus, Colletia; 8) familia Rosáceas: Cercocarpus, Rubus. Colectivamente son responsables de aproximadamente o 15 % das entradas de nitróxeno fixado bioloxicamente no mundo.

Algunhas destas plantas cultívanse polos seus froitos; como plantas ornamentais; ou utilízanse para estabilizar taludes inestables ou como pantallas cortaventos intercaladas con outras especies ás que subministran nitróxeno; ou son utilizadas polas súas propiedades farmacolóxicas.