Compoñente do potencial total de auga do solo debido a forzas de presión. Estas pódense deber: (a) á presión do aire ao resultar comprimido dentro do solo (potencial pneumático, π_pn); (b) á expansión dentro do solo de determinados minerais (arxilas expansibles, p. ex. do grupo das esmectitas) ao humectarse (potencial de expansión, π_ex); (c) ao desprazamento do solo (potencial de envolvente, π_env); (d) á carga hidrostática debida á inmersión (potencial de submersión ou hidrostático, π_u). En consecuencia, o potencial de presión π_p pódese expresar como: π_p =π_pn + π_ex + π_env + π_u. Algúns autores simplifican o potencial de presión expresándoo como a suma do potencial matricial, π_p^m, (en solos non saturados) e o potencial de inmersión, = π_p^u, (en solos saturados), e así, π_p = π_p^m + π_p^u, ao ser desprezables os restantes compoñentes, en moitos casos.

En condicións de campo, en solos saturados de auga, se se toma como plano de referencia o nivel da capa freática (nivel piezométrico), o valor do potencial de presión expresado en unidades de enerxía-peso (carga de presión) virá dado pola distancia vertical ao punto considerado debaixo da capa freática (cm). Sempre é positivo, xa que no plano de referencia (superficie da capa freática) e por riba del é cero. O potencial de presión pódese expresar igualmente como: enerxía/masa, J kg^-1; enerxía/volume, N m^-2 = Pa (Pascal), utilizándose un múltiplo (kPa = 1000 Pa). Cabe destacar que non todos os autores consideran os mesmos compoñentes deste potencial, nin utilizan a mesma nomenclatura para designalos. Isto é debido a que non sempre é necesario ter en conta todos estes compoñentes, sendo desprezables moitos deles en condicións de campo.