En ciencia do solo, compoñente do solo máis soluble que o xeso. A presenza de sales solubles en exceso fai que un solo sexa salino e produza efectos negativos para o ciclo vital das plantas non tolerantes. Na ciencia do solo exclúense do concepto dos solos salinos, tanto o carbonato de calcio (CaCO₃), que caracteriza os solos calcarios, coma o xeso (CaSO₄ · 2 H₂O), compoñente dos solos xesosos. Non é correcto considerar estas dúas últimas clases de solos como solos salinos, xa que tanto os efectos sobre a fisioloxía das plantas, coma o comportamento do solo e as técnicas de xestión duns e outros solos son completamente distintas. Así e todo, a coincidencia nun solo de carbonato de calcio ou de xeso cos sales máis solubles que o xeso levou algúns autores a incluír erroneamente o xeso como compoñente dos solos salinos. Os ións presentes na fase líquida dos solos salinos (Solonchaks^WRB) son: os catións Na⁺, Mg²⁺, Ca²⁺ e os anións cloruro, Cl⁻, sulfato, SO₄²⁻, hidroxenocarbonato, HCO₃⁻, que dan lugar a un gran número especies químicas (sales). Por outro lado, en solos sódicos con valores de pH moi altos (10-12) pode haber carbonato de sodio (Na₂CO₃) (Solonetzs^WRB).