Elemento químico, metal alcalino de fórmula química Na, número atómico 11, peso atómico 22,98 e estado de oxidación +1. No solo, pódese atopar na fase sólida en minerais tales como a albita (NaAlSi₃O₈) e, en forma iónica Na⁺, nas sedes de intercambio e na fase líquida. Na maior parte dos solos o seu contido é baixo tanto no complexo de intercambio coma na fase líquida. A presenza de sodio na fase líquida dos solos salinos mídese pola concentración no extracto de pasta saturada, mentres que o sodio da interface nos solos salino-sódicos e nos sódicos se determina por medio da porcentaxe de sodio intercambiable, (PSI), calculado a partir da relación de adsorción de sodio (RAS). Resulta desfavorable para as propiedades físicas do solo, xa que aumenta a inestabilidade da estrutura ao favorecer a dispersión e a destrución dos agregados, coa conseguinte diminución da permeabilidade e o aumento da compactación, entre outros efectos desfavorables. Segundo a concentración de calcio, pode chegar a ser altamente tóxico para plantas non tolerantes.