Fracción da materia orgánica do solo integrada por compoñentes orgánicos escasamente transformados de natureza variable, pero cunha composición bioquímica identificable (lípidos, polisacáridos, aminoazucres, aminoácidos e proteínas, fenois, taninos, fosfolípidos, ácidos nucleicos e ligninas).

Proceden da alteración estrutural progresiva de constituíntes macromoleculares da materia orgánica fresca, sobre todo os de natureza máis recalcitrante. A súa permanencia no solo é transitoria, xa que son utilizados como fonte de enerxía polos organismos do solo. A longo prazo, ou ben son descompostos a dióxido de carbono e auga ou se polimerizan/condensan para entrar a formar parte da composición das substancias húmicas.